Blet(-de-vilage)
Oxybasis urbica
Amaranthaceae Chenopodiaceae
Noms en français : Chénopode des villages, Ansérine des villages.
Descripcioun :Aquéu blet, pulèu rare, trachis dins li prado umido, proche d'aigo e d'oustau. Es uno planto bèn drecho que pòu faire fin qu'à un mètre d'aut. Se recounèis majamen à si fueio en triangle e un pau astado. I'a ges de fueio en aut de l'enflourejado. Li flour an 4 à 5 tepalo soudado soulamen à la baso.
Usanço :Couneissèn pas d'usanço particuliero pèr lou blet-de-vilage. Tant se poudrié èstre manjadis coume li meno d'aquest gènre.
Port : Grando erbo
Taio : 10 à 100 cm
Fueio : alterno
Tipe bioulougico : Teroufite
Cicle bioulougico : Planto de l'an
Gènre : Oxybasis
Famiho : Amaranthaceae
Famiho classico : Chenopodiaceae
Coulour de la flour :
Verdo
Petalo : ges
Ø (o loungour) flour : 0,6 à 1 mm
Flourido :
Estiéu - Autouno
Sòu : Ca
Autour basso e auto : 0 à 400 m
Aparado : Noun
Juliet à nouvèmbre
Liò : Prado umido
- Mueio
- Escoumbre e proche dis oustau
Estànci : Mesoumediterran
Couroulougi : Éurosiberiano
Ref. sc. : Oxybasis urbica (L.) S.Fuentes, Uotila & Borsch, 2012
(= Chenopodium urbicum L., 1753 )
Péu-de-lin(-di-flour-plano)
Cuscuta planiflora
Convolvulaceae
Àutri noum : Péu-de-lin, Péu-de-damo, Rasco, Barbo-de-mouine, Cuscuto.
Nom en français : Cuscute à fleur plane.
Descripcioun :Lou péu-de-lin-di-flour-plano douno d'èr à Cuscuta epithymum, pamens li flour soun blanco e pu pichoto. Es uno planto coumuno en basso Prouvènço au contro de sa cousino que mounto mai. Se n'en destrìo subretout que li sepalo an de lobe redoun e pas pounchu. Bessai que s'agirié de la memo meno qu'eisisto de bastard.
Usanço :Li péu-de-lin soun pas acampa au nostre. Caupon un glucoside, la cuscutino, qu'ajudo à caga e à secreta la bilo. La cuscuto de Chino, Cuscuta sinensis, èi vertuouso contro li proublèmo de proustato e d'ourmono encò lis ome o li femo. Se chabis en gelulo dins lou coumèrci. Tant se poudrié que siegue parié pèr li nostre.
Port : Erbo
Taio : 10 à 30 cm
Fueio : ges
Tipe bioulougico : Teroufite
Cicle bioulougico : Planto de l'an
Gènre : Cuscuta
Famiho : Convolvulaceae
Ordre : Solanales
Coulour de la flour :
Blanco
Petalo : 5
Ø (o loungour) enflourejado : 4 à 6 mm
Flourido : Printèms
- Estiéu
Sòu : Ca
Autour basso e auto : 0 à 1200 m
Aparado : Noun
Mai à avoust
Liò : Tepiero seco
- Relarg à jóuinis aubret
Estànci : Termoumediterran à Coulinen
Couroulougi : Éurimediterrano
Ref. sc. : Cuscuta planiflora Ten., 1829
